داليا عطية – القاهرة
في عالم بيتعاد تشكيله بالحروب والازمات .. اتجهت الدولة المصرية لاتخاذ قرارات تحمي بيها اقتصادها ومواردها وشعبها..
فظهر تساؤل علي الساحة ليه تم اتخاذ اجراءات ترشيد الطاقة الاخيرة في التوقيت ده ؟
واشمعنا بالشكل دا تحديدا ؟
احنا عارفين ان قرار الغلق الساعة ٩ مكنش سهل عليك ..
وعارفين ان في ناس كتير اتأثرت وشغلها اتغير ويومها بقي مختلف وأكيد عارفين ان مصر المحروسة ما تستاهلش ابدا انها تضلم ، دا شعور طبيعي جدا ومفهوم ..
لكن في نفس الوقت خلينا نبص على الصورة كاملة مش بس جزء منها .. اللي بيحصل مش في مصر لوحدها .. العالم كله خلال الفترة اللي فاتت اتعرض لضغط كبير جدا في الطاقة والوقود والاقتصاد
الازمة اللي بيمر بيها العالم خلت دول كتير كبيرة وصغيرة تاخد قرارات صعبة.. لكن ضرورية
في دول خفضت استهلاك الكهرباء بشكل كبير ، ودول قللت ساعات العمل ، ودول لجأت للعمل من المنزل ، ودول تانية وصلت لمرحلة انها تنظم استخدام الوقود نفسه واتخذت إجراءات أشد وابعد بكتير من المحتمل ، يعني ببساطة لما الضغط بيزيد كل دولة بتحاول تحافظ على مواردها بأقل خساير ممكنة
ولحد هذه اللحظة مصر من أفضل الدول بالنسبة لامكانياتها تعامل مع الازمة ومراعاة لكل الفئات ..
تعالى نعمل تجربة بسيطة على جوجل .. هنكتب تأثير أزمة الطاقة في الهند مثلا .. الأمر وصل في الهند بجانب النقص الكبير والتكدس على محطات الوقود انه حتى غاز الطهي أصبح غير موجود ..
باكستان راحت لأبعد من كدا بكتير ، وقللت من التجمعات الاجتماعية وخلت 50% من الموظفين يشتغلوا من البيت بالتناوب ، ووجهت الجامعات للتعليم عن بعد، ونفذت حزمة كاملة من إجراءات التقشف.
سريلانكا وسلوفينيا حددوا حصص الوقود للمواطنين وحطوا قيود على الشراء .. حتى اكبر الدول إنتاج وتصدير للنفط والغاز الطبيعي زي الأشقاء في الخليج العربي اتأثروا بالازمة واضطروا يزودوا اسعار الوقود على المواطنين لحد ما وصلت الزيادة في الإمارات من 30 ل 70 %
حتى في أوروبا وأكبر اقتصادات العالم الصورة مختلفتش كتير ، هتلاقي في بريطانيا الأمر وصل بيهم انهم يخزنوا الوقود في أكياس وجراكن ..
ألمانيا والنمسا بيحصل عندهم زيادة في سعر الوقود مرة واتنين في الاسبوع..
أمريكا نفسها رفعت سعر الوقود بنسبة 34.7 % من بداية الحرب على إيران
شوف واعرف بنفسك تداعيات الحرب على إيران وتأثيرها على أسواق الطاقة دفعت دول كتير لاجراءات استثنائية .. ومصر لما اتحركت ماكنتش بتعمل حاجة مختلفة عن العالم او خارج السياق بالعكس كانت بتحاول تاخد خطوة توازن بيها بين احتياجات الناس وقدرة الدولة انها تستمر بدون ضغط ..
السؤال اللي محتاجين نسأله لنفسنا
ليه لما دول العالم تعمل إجراءات تقشف او ترشيد او ترفع اسعار الوقود يبقي دا نجاح في إدارة الازمة ، ولما مصر تعمل إجراءات مشابهة لحماية مواردها وتقليل الضغط على الطاقة نسميه فشل او إجراء استثنائي
ودا مش معناه انك متتكلمش او متضايقيش، بالعكس، من حقك تسأل وتفهم وتناقش لكن كمان من واجبك انك تشوف الصورة كاملة ..
الإجراء الحالي هو بمثابة ضمان للاستمرارية لاطول فترة ممكنة خلال الازمة الحالية وعشان نبعد قدر المستطاع عن اتخاذ إجراءات أخرى في المستقبل لا تحتمل ..
أو أننا نضطر لتخفيف الأحمال لساعات طويلة ..
ومصر زى غيرها .. بتحاول تدير الموقف بأفضل شكل ممكن .. ومصر احسن من غيرها .. عشان بتخذ القرار اللي تراعي فيها كل الفئات وتحافظ على كرامة المواطن وانسانيته في ظل الظروف العالمية الجديدة والأزمات الإقليمية
وقبل كل شئ خليك دايما فاكر ان وعيك مسئوليتك .. والكلمة مسئولية
